கவிதையல்லாத கவிதைகள்

1
அதோ பார் நிலா. இல்லை சூரியன்.
வா அருகே சென்று பார்ப்போம்.
விழுந்து இறந்தன விட்டில் பூச்சிகள்.

2
அப்பாடா இன்று ஓய்வு.
சே இந்த பூனை மட்டும்.
ஏழை வீட்டு அடுப்பு.

3
தவளைகள் சத்தம் இன்று அதிகம்.
மழைக்காலமா என்ன ?
இல்லை வருகிறது தேர்தல்.

4
நட்சத்திரங்கள் கண்சிமிட்டின..
எத்துணை அழகாயிருக்கிறது
இந்த குடிசையின் கூரை.

5
இரும்புக் கதவுகள் இழுத்துப் பூட்டப்பட்டன...
காவலுக்கு தடிக் கம்புகளும் கத்திகளும்..
தன்னை காப்பாற்றி கொள்ள முடியா கடவுளின் சிலை.

6
கண்ணன் பிறந்தது காராக்கிரகம்.
எனக்கும் அஃதே சுகம்.
சிறையில் போலிச் சாமியார்.

7
நீயன்றி என் வாழ்க்கைக்கு அர்த்தம் இல்லை.
தேடிக்கொண்டு இருக்கின்றேன். எங்கு சென்றாய்.
இங்கனம் உனது ஜோடியாகிய செருப்பு.

8
எத்தனை உதறிய பின்னும்
எழுத மறுக்கிறது என் பேனா.
கவிதையல்லாத கவிதைகள்.